Фондацијата за нови технологии при Институтот ГАУС во соработка со Македонското научно друштво од Битола и со поддршка од локалната самоуправа, во Дојран одржа форуми за долгорочен одржлив развој на Дојранското Езеро во рамки на проектот „План Дојран”.
– Еден од форумите имаше цел да ги активира граѓаните, деловните луѓе и институциите во градењето нови бизнис-модели со еколошки стандарди, како и развивање стратегии, политики, начини и модели за одржлив социоекономски развој. Другиот форум беше наменет за децата и младите со цел кај нив да ја развие еколошката култура, волонтерството и да стекнат активни ставови и однесувања кон екосистемот на Дојранското Езеро, посочија организаторите.
Претходно Институтот ГАУС изработи студија за стратегиско предвидување и планирање во која беа дадени насоки и сценарија кои може да се очекуваат во наредните 20 години во регионот на Дојранското Езеро. Тоа им даде перспектива на учесниците во форумите дека само со нивно активирање е можно одржување на екосистемот на езерото и развој на индустријата.
Проектот „План Дојран” е финансиран од ЕУ-фондовите и се имплементира во рамки на ИПА-програмата за прекугранична соработка со Република Грција.
МИА
