Откупот на грозје кој почна проблематично поради познатите причини предизвикани од корона кризата, полека се приближува кон крајот. Директорот на ДЗИ Зоран Шапуриќ како и инспекторите се постојано на терен од првиот ден на откупот.
-Откупот на грозјето интензивно продолжува. Инспекторите на државниот инспекторат се постојано на терен на сите 44 откупни пунктови и вршат надзор согласно своите законски надлежности. Досега се откупени 82 милиони килограми грозје, сопствена берба околу 8 милиони кг , откуп по мерка ковид 19 на грозје со ниски шеќерни единици околу 4.5 милиони. И извоз околу 2.5 милиони килограми грозје – изјави за Агротим, Шапуриќ.
И денеска до вечерните часови, инспекторите на ДЗИ се на терен и вршат надзор на откупот на грозје.
-Има гужви на одредени пунктови што е добро, но капацитети на некои откупни пунктови се ограничени, а на лозарите им се брза што побрзо да го предат. Инаку за грозје со низок степен на малигани помошта е додатни 8 денари субвенција и лозарите се задоволни од мерката – потврдува Шапуриќ.
