После подолго време, минатиот вторник на 11.08.2020 повторно беше отворен добиточниот пазар во Битола.
Денес уште од рано наутро, забележавме дека има голем број на фармери кои продаваа ситен и крупен добиток. Најголема понуда имаше на телиња, јунци и крави, а помалку овци и живина.
Фармерите, продавачи се пожалија со слабата продажба. Велат рестрикциите поради корона вирусот си го направиле своето. Нема свадби, крштевки, сунети … ги нема иселениците од дијаспората кои до сега редовно доаѓаа секоја година, а сето тоа резултира со намалена побарувачка. Купувачи има многу малку – велат тие.
Намалената побарувачка секако ја намали и продажната цена на добитокот.
Така на пример цената на едно теле се движи од 10.000 – 12.000 денари
Покрупните грла имаат цена околу 100 денари за килограм жива мера. Само за споредба, минатата година нивната цена се движела од 120 – 150 денари за килограм жива мера.
Живината исто така се продава на парче и тоа петлите 350 денари , а пајките по 500 денари.
На добиточниот пазар во Битола имаше понуда и од добиточна храна.. Продавачите велат дека она што им е вишок , односно она што нема да го искористат за хранење на својата стока го продаваат. Цената на килограм пченка денес се продаваше за 12 денари.
