На 16 октомври, на меѓународниот аеродром во Астана пристигна необична пратка, 304 грла говеда од расата Ангус, вклучувајќи јуници и бикови, доставени со специјален товарен авион од Австралија. Животните беа увезени со цел да се подобри одгледувањето говеда во Казахстан, пишува Агроинформ.
Според информациите од службата за односи со јавноста на меѓународниот аеродром во Астана, вкупната тежина на пратката транспортирана од „Катар ервејс карго“ била дури 100 тони. Воздушниот транспорт на повеќе од 300 животни барал сложена логистичка организација. За време на транспортот, било потребно да се обезбеди усогласеност со меѓународните ветеринарни и хигиенски прописи, соодветни услови за животните и координација на сите вклучени служби.
Администрацијата на аеродромот соопшти дека животните биле истоварени и подготвени за понатамошен транспорт во согласност со пропишаните правила.
Се очекува дека слични специјализирани транспорти на живи животни би можеле да станат поредовни во иднина, со оглед на тоа што Казахстан планира да увезе дополнителни грла од расата Ангус, која е позната по добриот квалитет на месото и ефикасната конверзија на храната.
Со увоз на австралиски животни за одгледување, Казахстан сака да воспостави свои високопродуктивни стада и дополнително да го подобри производството на месо. Посебно внимание се посветува на северните делови од земјата, каде што има потенцијал за понатамошен развој на одгледувањето говеда. Воспоставувањето на стада за одгледување со повисок квалитет треба да придонесе за зголемување на производствениот капацитет и зајакнување на домашниот сектор за говедско месо.
Пристигнувањето на 304 грла од Австралија е само почеток на пообемна програма за развој на добитокот. До крајот на годината се очекува да пристигнат уште десет товарни авиони од Австралија со нови пратки животни за одгледување. Според плановите на Министерството за земјоделство на Казахстан, помеѓу 2026 и 2030 година, земјата има намера да набави приближно 40.000 грла говеда и дополнителни 10.000 овци и кози од странство.
Извор – Агроклуб
