Претставници на Агенцијата за храна и ветеринарство (АХВ), предводени од директорот Оливер Миланов, учествуваа на информативната и работна сесија посветена на актуелниот јавен повик за Мерка 115 – „Поддршка за активен женски член во земјоделското стопанство“, во рамки на Програмата за финансиска поддршка на руралниот развој за 2026 година. Сесијата се одржа на Факултетот за земјоделски науки и храна – Скопје, со учество на претставници на надлежните институции и советодавците на Агенцијата за поттикнување на развојот на земјоделството (АПРЗ).
Целта на работната средба беше подобро информирање на советодавците кои непосредно работат со жените земјоделки, разјаснување на условите и критериумите за аплицирање, потребната документација и постапките за користење на поддршката, како и намалување на административните пропусти при поднесувањето на барањата.
Во своето обраќање, директорот на АХВ, Миланов, ја истакна важноста од навремено и јасно информирање на жените земјоделки за можностите што ги нуди регулативата во надлежност на Агенцијата, особено во однос на регистрацијата на оператори со храна, производството и преработката на земјоделски и сточарски производи и нивното директно пласирање до крајните потрошувачи, односно продажбата од куќен праг.
-Ова е можност за поголема економска активност и дополнителни приходи и развој на малите семејни бизниси, вклучително и на оние кои се водени непосредно од жени носители на земјоделски стопанства, особено во руралните средини – истакна Миланов.
Тој посочи дека жените имаат значајна улога во производството и преработката на земјоделски и сточарски производи, а можностите за директно снабдување на потрошувачите отвораат дополнителен простор за развој на семејните бизниси, зголемување на приходите и зајакнување на економската самостојност на жените во руралните средини.
Според податоците од регистрите на АХВ, во 2026 година евидентирани се вкупно 2.439 производители и преработувачи на примарни земјоделски производи од животинско и неживотинско потекло, кои се регистрирани за директно снабдување на крајните потрошувачи. Од нив, кај 623 оператори се регистрирани за директно снабдување со производи од неживотинско потекло, 206 се жени носители на активностите. Кај 1.816 оператори регистрирани за директно снабдување со храна од животинско потекло, од кои најголемиот дел се производители на мед, 310 се жени носители на активностите.
Овие податоци го потврдуваат учеството на жените во системот на директно снабдување со храна, но истовремено укажуваат и на потенцијал за понатамошно зголемување на нивната вклученост во производството, преработката и пласманот на земјоделските производи.
Во рамки на сесијата беше нагласена и важноста од запознавање на жените земјоделки со условите за регистрација и евидентирање во соодветните регистри на АХВ, како и со барањата што треба да ги исполнат операторите со храна и носителите на активности во сточарските фарми. Информациите за условите и потребната документација се достапни на официјалната интернет страница на Агенцијата за храна и ветеринарство.
На работната сесија беа разгледани актуелниот јавен повик за Мерка 115, критериумите за подобност, потребната документација, постапката за аплицирање и практичните предизвици со кои се соочуваат земјоделките. Посебно внимание беше посветено на улогата на советодавците во пренесувањето точни и навремени информации, како и во обезбедувањето стручна помош при подготовката на барањата и деловните планови.
Учесниците ја истакнаа потребата од координирана соработка меѓу институциите и советодавните служби, со цел подобро искористување на достапните мерки за поддршка и олеснување на пристапот на жените до финансиските можности за развој на нивните земјоделски стопанства.
Агенцијата за храна и ветеринарство останува посветена на транспарентно информирање, унапредување на соработката со земјоделците и поддршка на развојот на безбедно и одржливо производство на храна, во однос на објавената мерка 115 на Платежната агенција со посебен акцент на можностите за развој на малите семејни бизниси и зајакнување на економската активност во руралните средини.
На работната сесија за мерката 115 учество се обратија Деканот на Факултетот за земјоделски науки и храна Миле Маркоски, директорката на Агенцијата за финансиска поддршка во земјоделството и руралниот развој, Даниела Иротова Лазарева, Елена Новачка од Владата на Република Северна Македонија и претставници од Федерацијата на фармерите.
АХВ
