Во кумановското село Ново Село на 25 октомври, со почеток во 10:30 часот, ќе се одржи традиционалната манифестација „Есенско пазарче“, во организација на Здружението за локален и рурален развој, со поддршка на Министерството за земјоделство, шумарство и водостопанство преку Програмата за поддршка на саеми. Целта на настанот е промоција на локалното производство, домашните производи и развојот на селскиот туризам. Посетителите ќе имаат можност да разгледаат и да купат локални производи, свежи зимници, месни и млечни преработки.
– Здружението постои пет години, а организираме два сезонски настани – пролетен и есенски, и се занимаваме со развој на селскиот туризам. На овој пазар ќе се промовираат мали производители на локални производи од кумановското поднебје. Целта е да ја доближиме нашата разновидна храна до пошироката јавност и да им покажеме на граѓаните дека старите и подзаборавени вкусови треба да се вратат на нашите трпези – изјави Роза Трајковиќ, претседателка на здружението и коорганизаторка на настанот.
Организаторите најавуваат побогата понуда и поширок избор на изложени производи и ги повикаа граѓаните на Куманово и околината да ја посетат манифестацијата. Манифестацијата е можност за претставување на малите локални производители, промоција на домашната храна и поддршка на руралниот развој.
МИА
