Трошоците за земјоделско производство во септември годинава бележат значителен раст, додека продажните цени на земјоделските производи имаат побавно зголемување, покажуваат најновите податоци за индексите на цените во земјоделството на Државниот завод за статистика. Според податоците, во септември 2026 година, во споредба со истиот месец лани, цените на инпутот, односно средствата што се користат во земјоделството, се зголемени за 8,8 проценти. Истовремено, цените на аутпутот, односно земјоделските производи, бележат раст од 2,3 проценти.
Најизразено поскапување кај тековните трошоци има кај енергијата, горивата и мазивата, чии цени се повисоки за 21,7 проценти на годишно ниво. Зголемување има и кај ветеринарните услуги од 9,3 проценти, минералните ѓубрива од 4,2 проценти, семињата од 3,3 проценти и добиточната храна од 2,9 проценти. Поскапуваат и средствата за инвестиции во земјоделството, за 8,6 проценти. Кај транспортната опрема зголемувањето изнесува 19,6 проценти, кај машините и опремата 12,7 проценти, додека кај зградите е регистрирано намалување од 0,3 проценти.
Кај цените на земјоделските производи, растот е поумерен. Цените на растителното производство во септември се зголемени за 3,9 проценти во споредба со истиот месец минатата година, додека кај добиточното производство е забележан пад од 2,1 процент. Меѓу растителните производи, најголемо зголемување има кај индустриските растенија, чии цени се повисоки за 18,9 проценти. Цените на зеленчукот се зголемени за 8,2 проценти, на компирот за 6,5 проценти, а кај вината растот изнесува 3,9 проценти.
Од друга страна, цените на житата и оризот се намалени за 2,2 проценти, кај добиточните растенија за 3,5 проценти, а кај овошјето и грозјето за 1,8 проценти. Во добиточното производство, цените на добитокот за колење се зголемени за 7,4 проценти, но кај производите од животинско потекло е регистриран пад од 7,6 проценти.
Изовр: Слободен печат
