Бразил изрази „длабока загриженост“ на првиот ден од забраната за увоз на пилешко и говедско месо од страна на Европската Унија (ЕУ), која побара гаранции за усогласеност со нејзините санитарни правила. Европската комисија го обвини Бразил дека не обезбедил доволно гаранции дека неговите производи се во согласност со европските правила против злоупотреба на антибиотици во сточарството.
Бразил „цврсто очекува тековниот технички дијалог да овозможи брзо, објективно, транспарентно и научно засновано решение“, соопштија бразилските министерства за надворешни работи и за земјоделие. Тие се надеваат дека таквата одлука „соодветно ги признава гаранциите што ги дава земјата“.
ЕУ сака да ја покаже својата будност откако беше остро критикувана од земјоделскиот сектор и Франција за договорот за слободна трговија потпишан во јануари 2026 година со јужноамериканските земји од Меркосур: Бразил, Аргентина, Уругвај и Парагвај. Бразил беше отстранет во мај од листата на земји што ги почитуваат правилата на ЕУ за интензивна употреба на антибиотици во сточарството, под притисок од секторот по потпишувањето на овој договор.
Во 2025 година, Бразил беше втор најголем извозник на говедско месо во ЕУ, со над 92.000 тони производи од говедско месо, што претставува над 713 милиони евра.
МИА
