Опасноста од пожари останува и нивниот број е сѐ уште многу висок, тие ги исцрпуваат пожарникарите и сите што секојдневно учествуваат во нивното гаснење – изјави денеска директорот на Дирекцијата за заштита и спасување, Стојанче Ангелов.
Според него, во текот на вчерашниот ден регистрирани се 26 пожари на отворен простор, а во моментот тежок пожар има на територијата на општина Струга, во атарот на селата Локов и Буринец.
– Се работи за шумски пожар, каде што пред гори неквалитетна шума, на некои места грмушки и трња, но постои опасност да навлезе и во квалитетна шума поради што разгледувавме можност за употреба на хеликоптер. Но во топлите часови од денот употребата на хеликоптерот е лимитирачка. Овде на самото место се упатени повеќе екипи на „Национални шуми“, кои се обидуваат да дојдат до попрецизни информации на кој начин овој пожар ќе биде ставен под контрола – информира Ангелов.
Тој посочи дека доцна синоќа имало драматична ситуација на територијата на општина Боговиње, во атарот на селата Урвич и Јеловјане, каде што огнот, кој се симнувал по папратот и сувата трева, на надморска височина од речиси 1.400 метри, се приближил кон селото Јеловјане.
– Но, од страна на храбрите пожарникари од Тетово, од кои побарав да отидат да му помогнат на локалното население, огнот беше сопрен на самиот пат. Поддршка дадоа и повеќе жители од локалното население овде од двете загрозени села. Во овој момент состојбата таму е стабилна, огнот е ставен делумно под контрола и не загрозува ниедно населено место ниту, пак, е зафатена квалитетна шума – истакна директорот на ДЗС.
Вчера доцна попладне, додаде, избуванал пожар и на територијата на општина Штип, во атарот на село Селце, во близина на вештачкото езеро Мантово, во падините на планината Серта.
– Во текот на ноќта и рано утрово штипските пожарникари, со поддршка на огнен тим на Дирекцијата за заштита и спасување, составен од доброволни пожарникари од Штип, работат на ставање под контрола на овој пожар. Рано утрово таму испративме и еден полициски хеликоптер, кој значително им помогна на пожарникарите да биде ставен под контрола еден крак од овој пожар. Очекувам во текот на денот да биде ставен под целосна контрола, а веднаш потоа и целосно изгаснат. Зафатена е претежно ниска вегетација: трева, трње, грмушки и друг тип на ниска вегетација, рече Ангелов.
Алепира до граѓаните да бидат внимателни, вегетацијата е многу сува и доволна е само една искра за вистинска катастрофа.
– За жал, и во текот на денешниот ден очекуваме појава на нови пожари, поради што повторно ја користам оваа прилика да апелирам до сите македонски граѓани, и покрај тоа што денес е 1 септември и започнува учебната година, опасноста од пожари сѐ уште не е намалена, сѐ уште е висока, поради што апелирам до граѓаните да бидат исклучително внимателни. Вегетацијата е многу сува и доволна е само една искра за вистинска катастрофа, истакна Ангелов.
МИА
