Во тек е бербата на родот од проектот Договорно производство на бессемена лубеница во организација на компанијата откупувач „Fres line“ и платформата Агротим.
После успешната ланска сезона, компанијата и годинава склучи договори со земјоделските производители кои и досега биле дел од проектот но и нови производители, докажани искусни земјоделци како Митат Исмаиловски од село Будаково.
Неговото производство може да послужи како пример што значи кога со земјоделство ќе се занимавате професионално, со извршување на сите агротехнички мерки и добивање на висок принос и квалитет, а со тоа и загарантиран профит.
-Со луѓето од компанијата Fres Line пред 5-6 години разговаравме на оваа тема, бидејќи јас имав една година пробно производство и се покажа дека може да биде успешен бизнис. Така се случи годинава со 2 хектари да се приклучам на проекто бидејќи сакав да ми биде договорен пласманот и цената на лубениците. Во тек е бербата на родот, задоволни сме многу од квалитетот, а очекувам дека ќе набереме 40-45 тони од хектар. Останува да се реализира договореното со откупувачите, околу цената и исплатата на бостанот – вели Исмаиловски за Агротим.
Според кажувањата на Исмаиловски, производството на бессемената лубеница освен што е скап расадот, другото вели дека нема разлика голема во текот на производството.
-Можам да кажам дека и полесна е за производство бессемената од обичната лубеница, бидејќи е издржлива од болести и штетници, па со 2-3 третирања успешно се развиваше. Наводнувањето се подразбира како и извршувањето на сите други агротехнички мерки. Ова е лубеница со посебен квалитет и вкус – вели Исмаиловски.
За договорното производство на бессемена лубеница годинава имаше голем интерес од страна на земјоделските производители благодарение на информираноста од страна на Агротим и поддршката од швајцарската Програма за зголемување на пазарната вработливост – ИМЕ во целокупниот процес.
Според најавите на земјоделците, проектот ќе продолжи и следната година со уште поголемо производство на поголеми површини.
